ཟི་ལིང་དུ་བོད་ཡིག་སློབ་ཆུང་འཛུགས་དགོས།


རིག་གནས་ནི་མི་རིགས་ཤིག་རྒྱུན་རིང་དུ་འཕེལ་རྒྱས་སུ་འགྲོ་བའི་སྲོག་རྩ་ཡིན་ལ། སྐད་དང་ཡི་གེ་ནི་མི་རིགས་རིག་གནས་ཀྱི་གྲུབ་ཆ་གཙོ་བོ་དེ་ཡིན་ཞིང་། སྐད་དང་ཡི་གེ་ནི་མི་རིགས་གཞན་དང་དབྱེ་བ་འབྱེད་པའི་མི་རིགས་ཤིག་གི་བརྡ་རྟགས་དེ་ཡིན་པར་མ་ཟད། མི་རིགས་ཤིག་གི་ཐུན་མོང་གི་སྲོག་སྙིང་དེ་ཡིན།

《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས》ཀྱི་ས་བཅད་བཞི་བའི་དོན་ཚན་བཞི་བར་མི་རིགས་སོ་སོར་རང་གི་སྐད་ཡིག་བེད་སྤྱོད་དང་འཕེལ་རྒྱས་སུ་གཏོང་བའི་དབང་ཆ་ཡོད་ཅེས་བསྟན་ཡོད། ཀྲུང་གུང་ཀྲུང་དབྱང་སྤྱི་ཁྱབ་སྲིད་འཛིན་ཞི་ཅིན་ཕེན་གྱིས་ཉིས་སྟོང་བཅུ་བཞི་ལོའི་ཟླ་དགུ་བའི་ཚེས་ཉེར་བརྒྱད་ཀྱི་མི་རིགས་ལས་དོན་བཞུགས་མོལ་ཚོགས་འདུའི་སྟེང་དུ་བསྟན་དོན་ལ། མི་རིགས་འདྲ་མཉམ་ནི་ཏང་གི་མི་རིགས་སྲིད་ཇུས་ཀྱི་རྨང་གཞི་ཡིན་ལ། མི་རིགས་འདྲ་མཉམ་རྒྱུན་འཁྱོངས་བྱ་བར་མི་རིགས་ཀྱི་ཁྱད་ཆོས་མི་འདྲ་བ་སྔོན་དུ་གཞིར་བཟུང་ནས། ཡུན་རིང་གཏན་གནས་ཀྱི་ཁྱད་པར་དང་། རིག་གནས་ཀྱི་ཁྱད་པར་ནི་ཁྱད་པར་གཙོ་བོ་ཡིན་པའི་དོན་དངོས་ལ་བརྩི་བཀུར་བྱེད་དགོས།

ཉིས་སྟོང་བཅུ་བཞི་ལོའི་ཟླ་བཅུ་བའི་ཚེས་བཅུ་གཉིས་ཉིན་《ཀྲུང་གུང་ཀྲུང་དབྱང་དང་། རྒྱལ་སྲིད་སྤྱི་ཁྱབ་ཁང་གིས་གནས་བབ་ཇེ་ལེགས་སུ་གཏོང་བར་ཤུགས་སྣོན་བྱེད་ཕྱོགས་སྐོར་གྱི་མི་རིགས་ལས་དོན་གྱི་སྙན་ཞུ》རུ་བསྟན་དོན། གྲངས་ཉུང་མི་རིགས་ཀྱི་སྐད་ཡིག་བེད་སྤྱོད་བྱས་ཏེ་མི་རིགས་རང་ཉིད་ཀྱི་སྐད་ཡིག་སློབ་གསོ་དང་ལེན་བྱེད་པའི་དབང་ཆ་ལ་བརྩི་བཀུར་དང་སྲུང་སྐྱོབ་བྱེད་དགོས་ལ། མཚམས་མ་ཆད་པར་གྲངས་ཉུང་མི་རིགས་ཀྱི་སྐད་ཡིག་རིག་གནས་ཀྱི་སློབ་གསོའི་ཆུ་ཚད་མཐོར་འདེགས་སུ་གཏོང་དགོས།

མཚོ་སྔོན་ཞིང་ཆེན་གྱི་ཟི་ལིང་ནི་ཞིང་ཆེན་གྱི་བོད་རིགས་རང་སྐྱོང་ཁུལ་དྲུག་གི་མི་རིགས་ལས་བྱེད་པ་འདུས་སྡོད་བྱ་པའི་ས་ཞིག་ཡིན་ཞིང་། དྲ་རྒྱའི་སྤྱི་སྡོམ་ལྟར་ན་ཉིས་སྟོང་བཅོ་ལྔ་ལོར་ཟི་ལིང་དུ་རྒྱུན་སྡོད་བོད་མི་འབུམ་གཉིས་ཡས་མས་ཡོད་ལ། དེང་སྐབས་བོད་རིགས་བྱིས་པ་ཁྲི་གསུམ་ལྷག་ལ་མི་རིགས་རང་ཉིད་ཀྱི་སྐད་ཡིག་སྦྱོང་སའི་སློབ་གྲྭ་ཞིག་མེད་པ་ནི་ཐག་གཅོད་མི་བྱེད་ཐབས་མེད་ཀྱི་གནད་དོན་ཞིག་ཏུ་གྱུར་ཡོད། ཟི་ལིང་དུ་བོད་ཡིག་སློབ་ཆུང་ཞིག་འཛུགས་རྒྱུ་ནི་རྒྱ་ཆེའི་བོད་མི་རིགས་ཀྱི་རེ་བ་དང་མཐུན་པར་མ་ཟད། ཁྲིམས་ལུགས་དང་མཐུན་ལ། ཏང་གི་མང་ཚོགས་ལམ་ཕྱོགས་སློབ་གསོའི་བྱ་འགུལ་གྱི་ནང་དོན་གྱི་ཆ་ཤས་གཅིག་ཀྱང་འདི་ཡིན་ཏེ། ཀྲུང་དབྱང་གི་མི་རིགས་ལས་དོན་ཚོགས་འདུའི་དགོངས་དོན་ལ་བྱེ་བྲག་གིས་སློབ་སྦྱོང་གཏིང་ཟབ་ཏུ་བྱ་བ་འདིས་མི་རིགས་འདྲ་མཉམ་ཡིན་པ་མཚོན་པ་དང་། བོད་རིགས་ས་ཁུལ་ཡུན་རིང་བརྟན་ལྷིང་དུ་གནས་པར་སྲུང་སྐྱོབ་བྱེད་པའི་དོན་དངོས་ཀྱི་བྱ་སྤྱོད་ཅིག་ཀྱང་ཡིན།

འདི་ལྟར་བསམ་བློ་བཏང་ན། ཁྱེད་ཞིང་ཆེན་སྲིད་གཞུང་དང་ཟི་ལིང་གྲོང་ཁྱེར་གྱིས་མི་རིགས་ཀྱི་སྲིད་ཇུས་དང་ཏང་གི་སློབ་གསོའི་བྱ་བའི་བྱེད་ཕྱོགས་གཟབ་ནན་གྱིས་ལག་ལེན་མཐར་ཕྱིན་དང་། གཏིང་ཟབ་ཏུ་སྤེལ་བ། རྒྱལ་སྲིད་སྤྱི་ཁྱབ་ཁང་གི་སྲིད་ཇུས་བྱེད་ཕྱོགས་གཞིར་བཟུང་ནས་མི་དཀྱིལ་སྙིང་བྱེད་པ་དང་། དམངས་འཚོ་ལེགས་བཅོས་བྱེད་པར་ཞབས་འདེགས་ཞུ་བ། དམངས་སེམས་གཅིག་ཏུ་སྒྲིལ་བར་སྣེ་ཁྲིད་བྱས་ཏེ། མི་རིགས་དང་མི་རིགས་ས་གནས་ཀྱི་མང་ཚོགས་ཀྱིས་སློབ་གསོ་ལག་བསྟར་བྱེད་པའི་འགན་དབང་ཁག་ཐེག་བྱེད་དགོས། མི་རིགས་སོ་སོའི་མང་ཚོགས་ཀྱི་ཚན་རིག་རིག་གནས་རྒྱུ་སྤུས་ཇེ་མཐོར་གཏོང་བ་དང་། མི་རིགས་ཀྱི་མཐུན་སྒྲིལ་དང་སྤྱི་ཚོགས་བརྟན་ལྷིང་སྲུང་སྐྱོབ་བྱས་ཏེ། ལོ་ངོ་ཉིས་བརྒྱའི་དོན་ཆེན་གཉིས་ཏེ། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་དམིགས་ཡུལ་ལ་འབད་བརྩོན་བྱས་ཏེ་མངོན་གྱུར་ཡོང་བ་བྱ་དགོས་པ་དང་། ཤེས་ཡོན་སྤྱོད་བཟང་བཅས་ཕྱོགས་ཡོངས་ནས་སྤྱི་ཚོགས་རིང་ལུགས་ཚད་ལྡན་ཅན་དུ་འཛུགས་སྐྲུན་བྱེད་མཁན་གྱི་མི་སྣ་དང་རྒྱུད་འཛིན་པ་གསོ་སྐྱོང་བྱ་བའི་དགོངས་དོན་གཞིར་བཟུང་ནས་ཟི་ལིང་ས་ཁུལ་དུ་བོད་ཡིག་སློབ་ཆུང་གཟུགས་དགོས་པའི་རེ་བ་ཞུས་པ་ཡིན་ལགས།

ཡར་ཞུ་མཁན། ཨ་རོལ་ཚང་།
༢༠༡༦ལོའི་ཟླ༡ཚེས༢༧ཉིན།

རྩོམ་ཁུངས། འཇོམས་འཕྲིན་སྟེགས།
ཡིག་སྒྱུར། རྟ་ནག་ལུང་རིགས།
རྩོམ་སྒྲིག་པ། བདེ་ལྷ་མོ།